: रात्रिकालीन चौंका मार क्रिकेट प्रतियोगिता लखाली का हुआ समापन।

रात्रिकालीन चौंका मार क्रिकेट प्रतियोगिता लखाली का हुआ समापन। जड़कल्ला के भागती आंगल नवा बछर के सुरवाती बेरा काली चौक लखाली म रात्रिकालीन चौका मार क्रिकेट प्रतियोगिता जांजगीर चांपा जिला के लखाली गाँव म युवा संगवारी मन करे रहिन ।   जेकर शुरुआत १५ जनवरी २०२५ ले हो के २० जनवरी २०२५ तक चलिस ये छै दिन चलइया क्रिकेट मैच म ३२ टिम भाग लेहे रहिस। मैच के नियमावली कुछ हटके रहिस एमा सिरिफ ३२ टिम ल ही मौका दिये जाना रहिस अऊ हरेक मैच ह ५-५ ओवर के खेले गिस अऊ सेमीफाइनल , फाइनल मैच हर ६-६ ओवर के रहिस जेमा हरेक टीम म ७-७ सदस्य शामिल होय रहिन एमा सिरिफ चौंका के गिनती होवत रहिस। मैच ल देखोइया मन बतात रहिन मैच ह काफी रोमांचक रहिस अऊ अलकर भीड़ जुरत रहिस बिक्कट मजा आईस जन्मों प्रतिभागी मन चौका मारे के ही चक्कर म रहय काबर कि छक्का मारे म गेंद ह गवांय के डर रहय अऊ गेंद के गंवाय म भरतना भरे बर परय।   फाइनल मैच हर चोरिया अऊ लखाली के बीच होइस चोरिया हर टास जीत के लखाली टीम ल बेटिंग करे के नेवता दिस लखाली वाले मन जोरलगहा बेटिंग करते हुए ६ विकेट म ११चौका मारके चोरिया वाले मन बर जीत के खातिर १२ चौंका के लक्ष्य राखे रहिन जेकर पीछा करते हुए चोरिया के टीम हर घलो ३ विकेट ल गंवा के ६ ओवर म ११ चौंका मारके लखाली टीम के बराबरी कर लिन अऊ मैच ह जीत हार के बिना बरोबरी म अटक गे।   तब जीत हार के फैसला बर समिति ह दुनो टीम ल सुपर ओवर के रूप म १-१ ओवर अऊ खेले बर दिये गिस जेमा चोरिया टीम हर पहिली बल्लेबाजी करते हुए ३ चौंका मारके जीत के लिए लखाली वाले मन बर ४ चौंका के लक्ष्य रखिन जेला लखाली वाले मन समय रहते ४ चौंका मारके अपन लक्ष्य ल पूरा करते हुए जीत हासिल कर लिन।   मैन ऑफ द मैच देवेंद्र चन्द्रा लखाली अऊ मैन ऑफ द टूर्नामेंट गोलू देवांगन हर रहिन। पूरा प्रतियोगिता के दौरान छक्का मारे के चक्कर म खिलाडी़ मन १० ठन गेंद ल गंवा दारिन जेकर भरतना भरे बर परिस।   विजेता के रूप म टिम लखाली ल १०००० रूपिया अऊ ट्राफी , उपविजेता टिम चोरिया ल ५००० रूपिया अऊ ट्राफी ,गाँव के सरपंच श्री संतोष चन्द्रा जी के हाथ से ईनाम दिये गिस।   प्रतियोगिता के दौरान अतिथि के रूप श्री गगन जयपुरिया जी, श्री संतोष चन्द्रा जी, श्री राजकुमार चन्द्रा जी, श्री हरदयाल चन्द्रा जी, श्री उमाशंकर चन्द्रा जी, श्री हेमचरण साहू जी, शामिल होइन अऊ आयोजन समिति म गोलू चन्द्रा, लक्ष्मण चन्द्रा, विनय चन्द्रा, मयंक चन्द्रा, पंकज चन्द्रा ,देवेंद्र कमल, हरिश कमल, अशोक महंत, कार्तिक कमल, अशोक चन्द्रा, संतोष चन्द्रा, अमित चन्द्रा ,कैलाश चन्द्रा, दिनेश श्रीवास, हितेश चन्द्रा, लक्की चन्द्रा, लक्की कमल, कोमल कमल आदि मन रहिन।   सफल आयोजन खातिर आयोजक समिति, प्रतिभागी खिलाड़ी , विजेता मन अऊ दर्शक समूह ल हार्दिक बधाई अउ शुभकामनाएँ। शुभेच्छु- प्रहलाद चन्द्र लखलिया